Mamma en Nina kyk na ‘n TV program oor Springbokke. Mamma verduidelik vir Nina wat dit beteken as ‘n Springbok pronk. Nina wil weet hoekom hulle dit doen. Mamma sê dat die Springbok sommer af show. Nina bly ‘n rukkie stil en vra dan waarom die Springbok wil af show as hulle almal in elk geval so hoog kan spring.
Kelnerin in wording
Nina help vir mamma in die koffie winkel. Sy bring die bestelling: “Mamma, die tannie wil ‘n snuifie koek hê.”
Laaste dag op aarde
Nina kry ‘n boodskap in haar Kersfees klapper wat lees: “Wat sal jy doen as vandag jou laaste dag op aarde is?”. Nina dink bietjie hieroor en antwoord met ‘n groot glimlag: “Ek sal baie bly wees, want ek is lief vir Jesus.”
Wit maak skoon
“Mamma, my gunsteling kleur is wit. Weet mamma hoekom?”
“Nee, Nina, hoekom?”
“Want wit is Liewe Jesus se kleur. En weet mamma hoekom hou ek nog van wit?”
“Nee, Nina, hoekom?”
“Want wit maak alles skoon. As mens se hartjie swart is, maak Liewe Jesus se kleur dit wit.”
Duur waatlemoen
“Mamma, my maatjie se ouma is 72 jaar oud en haar oupa is 76 jaar oud. Maar, mamma, die waatlemoen kos nou R79. Dis meer as wat die ouma en oupa oud is!”
Klein-warmrig
“Mamma, ek is klein-warmrig, want ek kry gou warm.”
Nuwe stewels
Pappa frons oor die kleur van Nina se pers stewels. Nina vra: “Waarom kla Pappa oor my nuwe stewels? Hy gaan dit mos nie dra nie.”
Die Bybel
“Mamma, weet jy, ‘n mens gebruik ‘n resep om ‘n koek te bak. As jy nie doen wat die resep sê nie, dan gaan die koek flop. Net so het God die Bybel gegee, sodat ons kan weet hoe om te lewe. As ons nie lewe soos die Bybel sê nie, dan gaan ons lewe ook flop.”
Babas
“As ooms kan naelpolitoer dra, dan kan hulle mos babatjies ook kry.”
Kommunikasie
“Mamma, weet jy – daar’s ‘n maatjie in my klas wat Engels EN Afrikaans kan praat!”
Mamma verduidelik dat die maatjie se mamma Afrikaans is en sy pappa Engels.
Nina dink hieroor en vra: “Hoe verstaan sy mamma en pappa dan vir mekaar?”
dielewedeurnina 